جبت جاز
الحمد لله حياتى مستقرة.. ليس فيها إلا بعض الاستفزاز..ودايماً عندى إحساس..إن خلاص كله باظ.. فبدل ماأقعد على البوتاجاز ..قلت أكتب .. جبت جاز..
الثلاثاء، 3 يناير 2012
إيه العلاقة في إن يكون حد مختلف عنك بيتظلم.. فتقول أحسن؟
2011 ظلموك فقالوا عام الأحزان
تناقلت جمل الفيسبووك أن الحمد لله غارت 2011 بكوارثها وبلاويها والكل متفائل وسعيد عشان يمكن نحسها يروح.. طيب لماذا؟ لا أعلم .. بالنسبة لي كان عاماً فوق الخيال.. أكثر من طموحي بمراحل..الثورة بالنسبة لي حالة مستمرة ومستحيل أن يتم الحكم عليها بالفشل قبل سنين.. والسنادي خلتني أحس إني وكل المصريين زي كدة اللي كان أعمى ومشلول شلل رباعي وأطرش كمان.. وفجأة.. أصبح مبصر وشايف زي الفل..وعمل عملية في أذنه فبقى بيسمع طشاش.. صحيح لسة مشلول .. شلل رباعي فظيع.. لكن على الأقل رجعله احساس إنه إنسان ممكن يتجاوب مع العالم.. صحيح لم نحقق الهدف الرئيسي في إن مصر يبقى فيها عدل.. عكس الظلم يعني.. لكن الثورات في مصر دايماً كانت بتبقى حالة بتروح وتيجي.. يعني بعد ثورة 19 الناس مانامتش لحد الجلاء.. لكن سوريا مثلا والجزائر في كفاحهم للاستعمار .. الحالة كانت عندهم كانت يوم بعد يوم زي حادثة دنشواي.. أو زي ماسبيرو ومحمد محمود.. سوريا هكذا الآن.. الجزائر مؤكد لهم يوم.. أو أيام .. أو سنين حتى .. وماذا يساوي الزمن في عمر الكون .. وماذا نساوي نحن لو لم نصنع شيئاً ونستفيد بغنائم 2011 لنصل للنهاية السعيدة لمصر.. هتفائل وهقول يا رب 2012 تبقى أكثر سخونة في الأحداث وأكثر قوة في طلب الحق .. وإن كان على الحزن على الشهداء فهو في القلب لا يتزحزح.. لكن الفرح بشباب مصر خلاه أمل ..